Kryeministri Edi Rama premtoi një tjetër investim për zonën muzeale të Gjirokastrës. Gjatë bashkëbisedimit me kryebashkiakun Flamur Golemi teksa po inspektonin punimet për ujësjellësin e ri, ai tha se do të financohet veshja me gurë e atyre banesave që kanë bërë shtesa gjatë viteve të tranzicionit dhe nuk janë në harmoni me ndërtesat karakteristike. Rama i kërkoi Golemit projektin për këtë investim duke i thënë se s’mund të ketë në Gjirokastër ndërtesa si në Kamëz.
“Tani këtë pjesën muzeale se e kam merak këtë punë. Këto shtëpitë, këto lloj formash, duhet t’i marrësh një e nga një në të gjtihë zonën muzeale, të adoptohen, të vishen me gurë dhe të mos ketë më shto ujë e shto miell. Merri një e nga një në gjithë zonën muzeale. Jo për t’i prishur, por për t’i sistemuar bashkë me banorët. Ne do të gjejmë një financim mbështetës. Më ra goja, tani është koha për ta bërë ti të paktën. Të lutem shumë bëj një projekt të detajuar, cep më cep çdo gjë”, u shpreh Rama.
Më tej Kryeministri tha se vitin e ardhshëm Gjirokastra ka për të qenë plot me turistë ndërsa pranoi vështirësitë e këtij viti për shkak të pandemisë.
©argjiroja.net
