E paralajmëruam ditë më parë se 30 korriku ka për të prodhuar zgjedhje farsë në Universitetin “Eqrem Çabej”, njësoj si edhe në disa universitete të tjera të vendit, dhe duket se kështu po ndodh. Dy ditë para zgjedhjeve, kandidati i vetëm për rektor, Bektash Mema, ka publikuar në faqen në Facebook të universitetit një video-mesazh përmes së cilës shpjegon se përse ai rikandidon për mandatin e dytë dhe çfarë synon të arrijë. Edhe pse i vetëm në garë dhe që praktikisht e ka të garantuar se pas 30 korrikut do të vijojë ta marrë rrogën si rektor, do duhej që së paku për sy e faqe të dynjasë, Bektash Mema të shpaloste një platformë të vetën, e cila t’i nënshtrohej një debati publik.
Ajo që është hedhur në faqen në Facebook të universitetit është thjesht një monolog i tij përballë kamerës që nuk i vlen askujt. I tillë është edhe emisioni me nota vanitoze i transmetuar ditë më parë në Tv Gjirokastra ku rektori rrëfente jetën e vet. Edhe pse i vetëm në garë, Mema nuk mund t’i shmangej një debati publik me studentë, kolegët akademikë dhe publikun në tërësi. Nuk po flasim këtu për tubime masive që bien ndesh me kufizimet e pandemisë, por ka plot forma të tjera alternative.
Video-mesazhi i publikuar prej tij është sa për të ‘larë gojën’ dhe për të dëshmuar me fort se 30 korriku është farsë që nuk i sjell asgjë të mirë universitetit të Gjirokastrës. Nëse shikon kandidatët për dekanë situata është akoma më dramatike. Gëzim Sala do të jetë sërish Dekan i Fakultetit të Shkencave Sociale. Njësoj si rektori Mema edhe ai garon me veten. Ky është mandati i dytë i tij me ligjin e ri të vitit 2015. Në po të njëjtin pozicion ka qenë edhe vite më parë përpara se të bëhej rektor. Tek Fakulteti i Shkencave të Natyrës ka të paktën dy kandidatë, Lavdi Hasani dhe Selfo Oruçi. Për Fakultetin Ekonomik s’ka asnjë kandidat për dekan sepse askush nuk i plotësonte kriteret e gradave shkencore.
Mjafton kaq për të kuptuar se sa e nderë është situata në Universitetin “Eqrem Çabej” dhe përse këto zgjedhje janë sërish një shans i humbur. 30 korriku do të shërbejë thjesht për të çertifikuar edhe njëherë në ato pozicione drejtuese kastën që rrënoi universitetin, i cili për fat të keq, rrezikon të shndërrohet në një kolegj profesional. Në videot më poshtë ndiqni monologun e Bektash Memës dhe kini parasysh se kush hesht për degradimin e universitetit, është po aq fajtorë sa ata që e rrënuan ndër vite me veprimet dhe mosveprimet e tyre.
©argjiroja.net
