Këshilli Bashkiak i Gjirokastrës ka miratuar një rregullore që ka objekt përcaktimin e kundërvajtjeve administrative për shkeljen e rregullave, normave detyruese të higjienës, shëndetit publik dhe etikës së bashkëjetesës shoqërore në fushën e sigurisë publike, qetësisë dhe moralit publik, mbrojtjes së mjedisit, hapësirës publike, si dhe procedurën e konstatimit të kundërvajtjes dhe vendosjes së sanksioneve administrative për to brenda territorit të kësaj bashkie.
Në nenin 14 të kësaj rregulloreje parashikohet edhe ndëshkimi me gjobë nga 1 mijë deri në 10 mijë lekë të reja nëse kafshët tuaja shtëpiake shkaktojnë ndotje akustike apo zhurma. Fjala vjen nëse qeni që ju mbani në shtëpi leh shumë apo shpesh dhe kjo përbën shqetësim për banorët, mund të ndëshkoheni me gjobë.
“Personat, të cilët mbajnë kafshë/shpendë shtëpiake, të shoqërimit apo të luksit, në banesa individuale apo në bashkëpronësi në zona të urbanizuara, janë të detyruar të mos lejojnë që ato të kryejnë ndotje dhe të shkaktojnë zhurma, duke u bërë shqetësim për pjesëtarët e tjerë të komunitetit, duke cenuar gëzimin e qetë të pronës së tyre”, thuhet në një prej pikave të Nenit 14 që parashikon “Kundërvajtje administrative nga pronarët/kujdestarët, në fushën e zbatimit të normave detyruese të sjelljes së kafshëve/shpendëve, në njësitë individuale të banimit, ambientet në bashkëpronësi dhe hapësirat publike”
Në rregullore thuhet më tej se struktura konstatuese për këto kundravajtje ne Bashkine Gjirokaster do te jete Policia Bashkiake dhe Agjencia Publike.
©argjiroja.net
