Në Gjirokastër vihet re një rritje e numrit të të infektuarve me Covid 19. Në katër ditët e fundit janë evidentuar 7 raste të reja me koronavirus. Rasti i djeshëm që u raportua nga Ministria e Shëndetësisë ishte i një nëpunësi të Kadastrës Gjirokastër.
Njësoj si rastet e tjera edhe ai kishte qenë gjatë kësaj kohe me pushime në jug të vendit. Burime nga Drejtoria e Shëndetit Publik në Gjirokastër thonë se të gjitha rastet mendohet se e kanë marrë Covid 19 jashtë qyteti gjatë kohës kur kanë qenë në Sarandë, Himarë apo vende të tjera të bregdetit.
Edhe është kërkuar zbatimi në mënyrë rigoroze i protokollit antiCovid, shumë prej njësive të shërbimit në bregdet i kanë neglizhuar këto masa, duke nisur që nga distanca e shezlloneve dhe e tavolinave. Po kështu vihet re edhe një shpërkujdesje nga vetë njerëzit kur është fjala tek përdorimi i maskës dhe ruajtja e distancimit social.
7 rastet e evidentuara së fundi në Gjirokastër janë vetëkarantinuar në shtëpi, në gjendje të qëndrueshme shëndetësore. Ka nisur ndërkohë hetimi epidemiologjik i kontakteve të tyre në Gjirokastër. Vetëm dje janë marrë rreth 30 tamponë, rezultatet e të cilave pritet të bëhen publike në ditët e ardhshme.
©argjiroja.net
