Presidenti Ilir Meta ishte sot pasdite në Dropull për të vlerësuar me një titull, pas vdekjes, Lefter Millon, një prej legjendave të futbollit shqiptar nga radhët e minoritetit grek në vendin tonë. Deri këtu s’ka asgjë anormale, përkundrazi ky nderim për Millon është i vonuar.
Në ceremoninë e organizuar me këtë rast ra në sy mungesa e kryebashkiakut të Dropullit, Dhimitraq Toli. Krah Presidentit ishin ish-deputeti i LSI-së, Vangjel Tavo, ish-ministri i PD-së i dënuar për korrupsion, Spiro Ksera, ish-kryebashkiaku me dy parti, Ahilea Deçka dhe disa njerëz të tjerë të lidhur me opozitën.
Nuk ka problem pse aty ishin këta njerëz që janë të angazhuar politikisht pranë opozitës, por mungesa e kryetarit të bashkisë përben një shkelje protokollare dhe zhvlerëson komplet titullin e nderimit për Lefter Millon. Solemniteti i këtij momenti bie kur vetë ceremonia ngjan më shumë si mbledhje politike e PD-LSI në Dropull në prag zgjedhjesh.
Sporti është i atillë për të bashkuar njerëzit, aq më tepër kur bëhet fjalë për një figurë të shquar si Lefter Millo. Dakord që Vangjel Tavo nuk e honeps dot Dhimitraq Tolin sepse i mori bashkinë, që deri më dje e drejtonte “kukulla” e tij, Ahilea Deçka, por kjo ceremoni duhej mbajtur larg luftës politike. Lefter Millo është i të gjithë Dropullit, socialistëve, lësëistëve, demokratëve e atyre që nuk iu plas fare për partitë.
Me siguri që në lënien jashtë ceremonisë së kryebashkiakut aktual të Dropullir, ka luajtur rol ish-deputeti Tavo. Nga ana tjetër kemi një standard të dyfishtë nga kreu i shtetit. Në një ceremoni të ngjashme në Tepelenë, Ilir Meta e kishte ftuar kryebashkiakun Tërmet Peçi, madje edhe kryebashkiakun e Gjirokastrës, Flamur Golemi, por në Dropull nuk ndodhi kështu.
Ky nderim “kaçakshe” që po i bëhet Lefter Lefter Millos mund edhe të ishte kursyer sado i mërzitur të jetë Vangjel Tavo që s’e ka më pushtetin në atë bashki. Nuk po na ha meraku pse nuk ishte në ceremoni personi Dhimitraq Toli, por kryebashkiaku i Dropullit, cilido qoftë ai.
Le të shpresojmë se të paktën Bashkia Dropull do të organizojë në javët e ardhshme një ceremoni më dinjitoze për Lefter Millon, duke qenë se Këshilli Bashkiak ka marrë prej kohësh vendimin për t’i dhënë një titull nderi Lefter Millos. Le ta ftojnë në këtë ceremoni edhe Vangjel Tavon, për t’i treguar ish-deputetit standardin që duhet të vendosim pavarësisht luftës politike.
©argjiroja.net
