Kryetari i Bashkisë Dropull, Dhimitraq Toli, i përgjigjet ish-deputetit të LSI-së, Vangjel Tavo, i cili përmes një deklarate në Facebook pretendon se Toli ishte njoftuar për ceremoninë e organizuar në Dervician, ku u nderuan nga Presidenti Ilir Meta, Lefter Millo dhe disa sportistë të tjerë të minoritetit. I pyetur nga ArgjiroLajm.net, Toli shprehet me keqardhje se si institucioni i Presidencës iu nënshtrua mllefit të ish-deputetit Vangjel Tavo ndaj tij dhe bashkisë që ai drejton. Toli e konsideron Tavon një të dëshpëruar dhe gënjeshtar që ka humbur gjithcka dhe se Dropullin s’mund ta mbajë dot më peng.
Reagimi i plotë i kryebashkiakut të Dropullit.
Nuk u surprizova fare nga reagimi i ish-deputetit, që nga dëshpërimi se ka humbur gjithçka, sillet së fundi si gënjeshtar edhe në rrjetet sociale. Siç e theksova edhe në reagimin tim për Tv Gjirokastra, unë nuk kisha një ftesë për të marrë pjesë në atë ceremoni dhe gjerat ishin stisur ne ate menyre qe te mos kisha nje ftese, ku nderoheshin Lefter Millo e figura të tjera të shquara të sportit nga radhët e minoritetit etnik grek në Dropull. Kuptohet, që ish-deputeti i dëshpëruar dhe shpurra e tij që e përdorën Dropullin për vite me radhë për interesat e tyre personale, nuk donin që unë të isha i pranishëm aty. E megjithatë ky rast nuk ia zbeh fare madhështinë Lefter Millos, thjesht tregon se si për fat të keq edhe institucioni i Presidentit në Shqipëri i nënshtrohet mllefit të një ish-deputeti që sundoi dhe përçau Dropullin si askush tjetër. Le të vazhdojë në mllefin dhe dëshpërimin e tij. Dropulli s’ka për të qenë më peng i një mashtruesi si ai. Kohë të tjera kanë ardhur!!!
