Ministri i Rindërtimit, z. Arben Ahmetaj në një intervistë për Euronews Albania tha se procesi i rindërtimi po ecën me hapa të kënaqshëm, ndërsa shtoi se vonesat e deritanishme lidhet edhe me situatën e krijuar për shkak të pandemisë.
Sipas z. Ahmetaj, vendi ynë ndryshe edhe nga vende shumë më të zhvilluara siç është Italia, është duke zbatuar një formulë unike dhe sociale, që është ajo e rindërtimi nga e para dhe pajisja e personave të dëmtuar nga tërmeti me banesa krejtësisht të reja.
Teksa i cilësoi vonesat e deritanishme si procedura, z. Ahmetaj tha se në Thumanë aktualisht është duke u punuar me infrastrukturën dhe në javën e parë të tetorit nis ndërtimi i pallateve.
“Thumana ka tre sajte; 1 i kombinuar me shtëpi individuale dhe pallate, një sajt është infrastrukturë për të aksesuar sajtet dhe tjetri pallatet. Pallatet fillojnë në fund të shtatorit ose në fillim të tetorit.
Është dashur kohë e gjatë për projektet dhe planet, por janë realizuar në kohë rekord.
Janë katër programe të avancuara:
Programi i parë i shtëpive individuale, që janë në proces rindërtimi. Brenda këtij viti do të këte një numër të madh shtëpish ku qytetarët do festojnë vitin e ri. Asnjëri nuk ka arritur të ndërtojë shtëpi në 25 ditë dhe cilësore.
Programi i dytë është programi i granteve, janë shpërndarë deri tani 86 mln dollarë kesh për familjet me dëmtime.
Programi i tretë është infrastruktura. Ju referuar Thumanës, por në Thumanë nuk mund të ketë pallate pa u ndërtuar infrastruktura. Nuk bëhet fjalë për vonesë, por procedura e ndjekur deri tani.
Programi i shkollave, jemi duke ndërtuar në katin e tretë në shumë shkolla, pra janë në fazën e fundit të zhvillimit.
38 shkolla do të ndërtohen nga fondi i zhvillimi, 38 shkolla nga bashkia e Tiranës”, u shpreh ministri Ahmetaj.