Gjatë ditës së sotme janë krijuar radhë të gjata makinash në pikën kufitare të Kakavijës. Shkak i radhëve të herë nuk është bërë plotësimi i kuotës së kalimit, por testet e koronavirusit. Mësohet se shqiptarët me dokumente greke që shkojnë në Greqi përveç PCR testit që u tregojnë autoriteteve, janë të detyruar të bëjnë edhe tamponin në Kakavijë. Kjo situatë ka bërë që të ketë vonesa në këtë pikë kufitare, pasi ky është një rregull i ri i vendosur nga pala greke. Tamponi merret vetëm në pikën kufitare të Kakavijës, jo në atë të Kapshticës.
Ndërkohë, në mesin e muajit gusht, në pikat kufitare të Kakavijës dhe Kapshticës u krijuan radhë kilometrike makinash. Situatë kaotike u krijua në pikën Kufitare të Kakavijës, ku shqiptarët qëndruan 5 ditë në radhë për të kaluar doganën. Shkak i situatës u bë marrja e tamponit nga pala greke. Por, edhe disa ditë më parë u krijuan radhë në pikën doganore të Kapshticës, pasi u plotësua kuota prej 300 personash.
Nuk mungoi edhe një reagim nga Ministria për Evropën dhe Punët e Jashtme, e cila njoftoi se edhe për 14 ditë të tjera, nga data 1-15 shtator 2020, mbetet në fuqi kufizimi i hyrjes për shtetasit shqiptarë në tokën greke. Sipas njoftimit deri më 15 shtator shqiptarët që duan të futen në tokën helene duhet të kenë bërë tamponin dhe aplikimin online. Po kështu nga pika doganore e Kapshticës do të kalojnë 300 vetë në ditë, ndërsa nga Kakavija 750 persona në ditë.
