Kryetarja e LSI-së, Monika Kryemadhi, tha sot në mbrëmje se në zgjedhjet e ardhshme, ajo çka do të bëhet ndryshe nga çfarë bëri Meta me këtë parti është se do të jenë më demokratë në zgjedhjen e kandidatëve për deputetë.
Kryemadhi u shpreh gjatë një interviste për gazetaren Eni Vasili, se biznesmenët do të lihen jashtë listave të kandidatëve për deputetë, pasi ka konflikt interesi.
Pyetje: LSI shkon për herë të parë në zgjedhje me Kryemadhin drejtuese, çfarë do bëni ndryshe nga Ilir Meta?
Kryemadhi: LSI do jetë më demokratike në zgjedhjen e kandidatëve të saj. Do të jenë të rinj dhe të reja që kanë jo vetëm një histori lidhje me LSI që në shkolla, por do jenë njerëz që do kenë përfaqësim të denjë me qytetarin. Një strukturë që kandidatët e saj do jenë më përfaqësuesit e komunitetit që do të garojnë. S’mund të them që jam më e mirë se Ilir Meta, por duhet të them se LSI po hyn në një fazë që detyrohet të hapë dhe të zgjerojë partinë me figura akademike dhe profesionale. Do jetë më e reduktuar nga bota e biznesit, sepse mendojme që ka konflikt interesi.
