Altin Dumani është zgjedhur drejtues i Prokurorisë së Posaçme Kundër Krimit të Organizuar dhe Korrupsionit (SPAK). Kandidati i parë, Adnan Xholi ka marrë 1 votë nga anëtarët e KLP, ndërsa Dumani dhe Kondili kanë marrë nga 5 vota, duke bërë që të votohen në raundin e dytë.
Dumai është shpallur fitues me 5 vota kundrejt 4 votave të Kondilit, duke u emëruar kreu i ri i SPAK. Ai e merr postin e mbajtur deri tani nga Arben Kraja, në datën 19 dhjetor, dhe do të jetë për tre vite në krye të institucionit më të rëndësishëm të akuzës shqiptare.
Kush është Altin Dumani?
Altin Dumani vjen nga radhët e Prokurorisë së Apelit. Ai është lindur në Shupenzë të Dibrës dhe është një nga prokurorët që drejtoi i pari njësinë Task-Forcë, ngritur vite më parë për të luftuar krimin e jakave të bardha. Ka një karrierë prej 20 vitesh si prokuror, në mars të vitit 1999, ka shkelur për herë të parë në prokurori, me detyrë në Sarandë.
Ai u bë drejtues prokurorie për herë të parë në Tropojë, në vitin 2000, një post sipas Dumanit që u refuzua nga shumë të tjerë për shkak të çështjeve problematike atje. Altin Dumani bëri bujë me qëndrimin e akullt që mbajti gjatë gjykimit të 29 të pandehurve të Gërdecit dhe 3 dënimet e përjetshme që kërkoi për tre nga të pandehurit kryesorë të tragjedisë së 15 marsit 2008.
Vite më parë kur u pyet se pse vendosi që të jetë pjesë e SPAK, Dumani u përgjigj duke thënë se ka lënë mënjanë komoditetin e Prokurorisë së Apelit dhe do t’i përkushtohet luftës ndaj krimit.
Altin Dumani ka mbajtur dhe detyrën e zv.drejtuesit të Prokurorisë së Posaçme, duke zëvendësuar Arben Krajën në periudhat kur ai largohej me detyrë jashtë vendit. Dumani është prokurori i cili udhëhoqi operacionin që çoi në pranga 13 persona në vitin 2021 – mes të cilëve edhe gjyqtaren e Gjykatës së Krujës Enkeleda Hoxha.
Po ashtu, Altin Dumani është dhe një nga bashkëdrejtuesit e operacionit “Plumbi i artë”, ku në bashkëpunim me Policinë e Shtetit u krye arrestimi i 16 bosëve të krimit dhe ushtarëve të tyre. Ndërkohë, 14 kriminelë të tjerë janë shpallur në kërkim ndërkombëtar.
Ata u zbuluan pas dëshmisë së vrasësit me pagesë Nuredin Dumani. Ka qenë pikërisht prokurori Altin Dumani që ka zbërthyer vrasësin dhe autorin e disa ngjarjeve krimianle, që të bëhen “pentito” dhe të rrëfente porositësit. Në një rast, ai tregoi se një bos i krimit i kishte ofruar 500 mijë euro për të vrarë një rival.
Sot, në intervistimin publik para anëtarëve të Këshillit të Lartë të Prokurorisë, Altin DUmani ka thënë se ka hetuar 99 çështje dhe 284 persona.
“U zgjodha një ndër anëtarët e SPAK, me një vlerësim maksimal. Për më tepër u bë rreth 3 vjet që jam anëtar i kësaj prokurorie të posaçme. Nuk e shoh si një vend pune, e shoh si një mision shumë i vështirë. Jam përpjekur që në këto 3 vjet të jap maksimumin tim. Më tej pata fatin të zgjidhem zv.drejtues në Prokurorinë e Posaçme”, vijoi Dumani.
I pyetyur drejtpërdrejt nga anëtarët e KLP për vizionin e punës së tij, kreu i ri i SPAK tha se për të nuk kishin rëndësi emrat por provat. “Drejtuesi është pasqyra ku shihet vartësi”, kështu ka thënë Dumani, teksa ka vlerësuar rëndësinë e frymës së mirë dhe motivimit në punën në grup të prokurorëve.
“Emri nuk ka rëndësi. Prova. Emri nuk më bën përshtypje. Prova është se duhet një proces i rregullt. Kam patur rastin të hetoj disa nga çështjet më të rëndësishme, për krimin e organizuar. Kam një vlerësim maksimal për periudhën që kam qenë pjesë e atij projekti”, vijoi ai.
