Ministrja e Financave dhe Ekonomisë, Delina Ibrahimaj, në konferencën e fundvitit është pyetur për sulmet kibernetike ndaj bankave. Sipas Ibrahimajt, ka ndodhur një gjë e tillë, por nuk ka vend për shqetësime, pasi nuk janë prekur llogaritë e qytetarëve.
“Ka pasur njoftime, që sektori bankar ka qenë i sulmuar nga sulme kibernetike. Unë dua t’ju siguroj që ka në muaj, mbi 1 milion sulme, të cilat janë sulme të përditshme, qoftë në sistemin privat, qoftë në sektorin publik. Pra, tashmë lufta kibernetike është një luftë e cila është e prekshme, e cila prek çdo sektor, publik dhe privat, infrastrukturë kritike dhe jokritike. Banka në fjalë ka bërë komunikimet e saj dhe në bazë të komunikimeve që kemi pasur me guvernatorin e Bankës së Shqipërisë, nuk ka pasur prekje të llogarive të individëve”, është shprehur Ibrahimaj.
Sipas saj, sektori bankar është nga ata sektorë që ka marrë masa që herët, sa u përket sulmeve kibernetike dhe sigurisë kibernetike.