Egnatia konfirmon momentin pozitiv, ndërsa Partizani zhytet në krizë. Java e shtatë e Abissnet Superiores ka prodhuar rezultate të bujshme, me rrogozhinasit që mposhtën Vllazninë 3-1 dhe Vorën që regjistroi një fitore historike 4-1 ndaj të kuqve të kryeqytetit.
Në Rrogozhinë, Egnatia triumfoi bindshëm ndaj Vllaznisë, pavarësisht rotacionit të gjerë në formacion, me mendjen edhe te angazhimet europiane. Kampionët e zhbllokuan rezultatin që në minutat e para, falë një penalltie, ndërsa Adjesa dyfishoi avantazhin, duke i dhënë më shumë qetësi skuadrës vendase.
Në pjesën e dytë, shkodranët reaguan, rritën presionin dhe arritën të shkurtonin diferencën, duke rihapur përkohësisht sfidën. Megjithatë, goli i Grudës, ish-lojtarit të Vllaznisë, vulosi fitoren 3-1 për Egnatian, e cila vijon të konfirmojë formën e mirë.
Surpriza e madhe e javës erdhi nga Vora. Skuadra e drejtuar nga Arjan Bellaj mposhti Partizanin me rezultatin e thellë 4-1, duke marrë një fitore historike përballë një prej emrave të mëdhenj të futbollit shqiptar.
Një debutim për t’u harruar për trajnerin kroat Mislav Karoglan në stolin e të kuqve, të cilët u dorëzuan përballë vrullit të vendasve. Protagonisti absolut ishte Bernard Karrica, i cili realizoi një tripletë, me dy prej golave që spikatën për nga bukuria.
Fitorja e Vorës mund të kishte marrë përmasa edhe më të mëdha, por një tjetër gol i vendasve u anulua pas ndërhyrjes së sistemit VAR.
Ndërkohë, situata te Partizani bëhet gjithnjë e më shqetësuese. Pas shtatë javësh kampionat, të kuqtë renditen në vendin e fundit me vetëm katër pikë, ndërsa kanë pësuar plot 17 gola, një bilanc negativ që nuk ishte regjistruar më parë nga klubi në këtë fazë të sezonit.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
