Trajneri i kombëtares Sylvinho dhe një delegacion i Federatës po inspektojnë disa hotele në Gjermani për të përcaktuar se ku do të vendoset kombëtarja gjatë finaleve të Europianit. Drejtori i komunikimit në FSHF, Fatjon Kodra, tregon për Tv Klan se Sylvinho po kërkon kushtet më të mira të mundshme për futbollistët e tij.
“Deri tani kemi parë dy hotele. Do të shohim edhe një të fundit që janë të themi në zonën e Dortmundit. Ambiente për të bërë stërvitje brenda apo jashtë, fizioterapi, masazhi siç i kemi ne edhe në Shqipëri në shtëpinë e futbollit. Trajneri kërkon me doemos që ne t’i ofrojmë Kombëtares Shqiptare kushte sa më të mira, sa më praktike dhe sa më pak udhëtime, më të shkurtra.”
Por tashmë pas 3 ditësh nga hedhja e shortit, cilat janë emocionet e Sylvinho.
“Nuk kam parë asnjë lloj frike asnjë lloj sikleti, përkundrazi siç ishte edhe pas shortit është e njëjta gjë. Nuk ka ndryshuar asgjë tek ai është shumë i kënaqur që ne përgatitemi për një aventurë kaq të bukur dhe të luajmë me skuadra kaq të mëdha.”
Në ditën e dytë të finaleve më 15 Korrik, kombëtarja do të luajë ndeshjen e parë kundër Italisë në Signal Iduna Park të Dortmundit. Katër ditë më pas kundër Kroacisë në Volksparkstadion të Hamburgut, ndërsa më 24 Korrik ndaj Spanjës do të luhet në Merkur Spiel-Arena të Düsseldorfit.