Kanë kaluar më tepër se 24 orë nga aksidenti i ndodhur mbrëmë pranë fshatit Humelicë në Gjirokastër, por viktima nuk është identifikuar ende. Trupi i tij ndodhet në morgun e spitalit “Omer Nishani”. Policia ka marrë disa banorë të Humelicës, me shpresën se do të ndihmonin në identifikimin e tij, por ata kanë thënë se viktima nuk është banor i fshatit.
Argjirolajm.net siguron një foto të burrit, i cili është rreth 50 vjeç, por për shkak se kemi të bëjmë me imazhe të rënda, ne nuk e publikojmë dot pa i mbuluar fytyrën.
Natyrisht që kjo nuk ndihmon shumë në identifikimin e tij, por ne vlerësojmë se nëse foto publikohet sikundër është, shkelim etikën dhe mund të trazojmë ndjenjat e familjarëve apo të afërmve të tij. Le të shpresojmë që të ndihmojë në identifikim veshja e viktimës.
Ai u përplas për vdekje mbrëmjen e shkuar nga autobusi i linjës Vlorë-Athinë. Ngjarja ndodhi në rrugën nacionale Tepelenë-Gjirokastër, pranë fshatit Humelicë. Policia shoqëroi në komisariat shoferin e autobusit, shtetasin L.R, 45 vjeç banues në Vlorë, për të dhënë sqarime mbi ngjarjen e rëndë. Ky ishte aksidenti i parë për vitin 2020 në Gjirokastër.
©argjiroja.net
