Dy të rinjtë shqiptarë që humbën jetën në aksidentin tragjik në Itali janë identifikuar. Nga aksidenti tragjik viktimë kanë mbetur Blendi Syla, 20 vjeç dhe Robert Daçi, ndërsa emri i të plagosurit nuk është bërë ende publik.
Aksidenti ndodhi, teksa automjeti me të cilin udhëtonin të rinjtë shqiptarë u përplas me një kamion. Dy shqiptarët u nxorën pa shenja jete nga automjetit, ndërsa në mjetin tjetër ndodheshin dy persona, një burrë dhe një grua, të cilët kanë mbetur të lënduar. Ndërkohë, të afërmit e njërit prej viktimave, Blendi Sylës, kanë reaguar në rrjetet sociale.
“Me dhimbje të thellë njoftoj ndarjen e parakohshme nga jeta të nipit tim Blendi Syla 20 vjeç, i cili humbi jetën tragjikisht si pasojë e një aksidenti në Itali. Familja Çekaj informon se, për momentin, data dhe ora e ceremonisë së varrimit nuk janë përcaktuar, pasi pritet kthimi i trupit në Shqipëri. Sapo të kemi informacion të konfirmuar, do t’ju njoftojmë në vijim.
Falënderojmë të gjithë të afërmit, miqtë dhe dashamirësit për ngushëllimet dhe mbështetjen në këto momente të vështira. I paharruar qoftë kujtimi i tij. Zoti e pastë në paqe shpirtin e tij”, shkruan një i afërm i Blendi Sylës në një postim në rrjetet sociale.
