Filmin “Koncert në vitin 1936” me siguri që e kanë parë të gjithë, aq më tepër libohovitët, të cilin shohin me nostalgji në këtë film si ka qenë Libohova dikur në vitet ’70 kur është xhiruar ky film. Nuri Beu ishte një prej personazheve të atij filmi.
Ai kundërshtonte me forcë koncertin që do të mbanin ‘theatrinat’ e ardhura nga Tiranë, pasi babai i njërës prej tyre, Pandua, nuk e kishte lejuar atë të merrte pjesë në Kongresin e Lushnjes. Tritan Shehu ka marrë prej dy ditësh rolin e Nuri Beut.
Ai kundërshton një aktivitet që do të organizohet në Libohovë në datat 9-11 qershor. Bëhet fjalë për një panair festiv tradicional, me kostume popullore, muzikë, gatime, art etj. Ky është organizim i një subjekti privat, por i mbështetur nga Ministria e Kulturës dhe i programuar muaj më parë për t’u zhvilluar në këtë periudhë.
Tritan Shehu akuzon Mirela Kumbaron se po e përdor këtë aktivitet për fushatë elektorale. Gjatë një interviste në Tv Channel 7 ai tha se të majtën e ka kapur paniku nga humbja, prandaj po përdor artilerinë shtetërore. Për këtë ai iu referua aktivitetit që do të zhvillohet në Libohovë.
“Duan të përdorin të gjithë artilerinë e saj në mënyrë të paligjshme, jo etike. Por ta dinë mirë që bëjnë efekt të kundërt. Qytetarët nuk janë budallenj, nuk gënjehen nga ca show absurd siç kanë bërë këto kohë, nuk gënjehen nga ca qofte apo byreqe që mund të jepen atje, as nga pesë lekë. Por qytetarët mendojnë qartësisht për të ardhmen e tyre, për zhvillimin e familjes së tyre dhe të vendit”, tha Shehu.
Njësoj si Nuri Beu tek filmi “Koncert në vitin 1936” që nuk e pengoi dot koncertin, as ‘Nuri Beu’ që PD-ja kandidon për deputet në Gjirokastër, nuk e pengon dot një aktivitet promovues për Libohovën.
/Libohova Online/
