Prokuroria e Posaçme ka paraqitur këtë të hënë pretencën për zonjën Fatime Kryemadhi dhe disa nga personat e tjerë, të akuzuar në dosjen e ndarë ku përfshihen edhe Ilir Meta e Monika Kryemadhi, raporton newsbomb.al. Bëhet fjalë për Piro Xhixhon dhe Ema Çokun.
Nëna e politikanes Monika Kryemadhi dhe tashmë ish-vjehrra e Ilir Metës, akuzohet për veprën penale “Pastrim i parave” dhe SPAK kërkon që Fatime Kryemadhi të dënohet me 7 vite e 6 muaj burg.
Megjithatë, organi i akuzës ka lënë të hapur mundësinë që me gjykim të shkurtuar, 1/3 e dënimit të reduktohet dhe të zbresë në 5 vite burg. Për shkak të moshës, SPAK ka kërkuar që dënimi me burg të konvertohet në 5 vite shërbim prove.
Prokurorët që përfaqësojnë akuzën, kanë kërkuar gjithashtu në pretencë që zonjës Fatime Kryemadhi t’i sekuestrohet edhe vila që ajo ka në zonën e njohur si “Kodra e Diellit” në Tiranë. Ajo e ka justifikuar me burime të ligjshme vlerën e vilës, por sipas SPAK, vlera është ekuivalente e shumës që dyshohet se nëna e Monikës ka pastruar.
Gjithashtu, Prokuroria e Posaçme ka kërkuar që edhe babai i politikanes Erisa Xhixho, shtetasi Piro Xhixho, dukur funksionarë i lartë i shtetit, të shpallet fajtor dhe të dënohet me 4 vite e 6 muaj burg për veprën penale “Korrupsion pasiv i funksionarëve të lartë shtetërorë”.
Gjykatës së Posaçme i është kërkuar që në rast se shtetasi Piro Xhixho shpallet fajtor, për shkak të gjykimit të shkurtuar, dënimi të zbresë në 3 vite burg. Sipas SPAK, nisur nga mosha dhe fakti që Xhixho si kryetar i AKEP nuk ka pasur përfitime personale, dënimi me burg duhet të konvertohet në shërbim prove.
Shtetësja tjetër Ema Çoku, akuzohet nga prokuroria për veprën penale “Pastrim i parave” kryer në bashkëpunim, ndaj SPAK i është drejtuar togave të zeza me kërkesën që ajo të dënohet me 7 vite burg, raporton newsbomb.al.
Megjithatë, për shkak të gjykimit të shkurtuar, Prokuroria e Posaçme thotë se dënimi për Ema Çokun duhet të ulet në 4 vite e 8 muaj. Prokurorët kanë theksuar se duke marrë parasysh rrethanat e tjera, GJKKO duhet të bëjë pezullimin e dënimit dhe të vihet në provë për 5 vite.
Megjithatë, mbetet për t’u parë nëse Gjykata e Posaçme do të pranojë pretencën e Prokurorisë së Posaçme, ama në çdo rast togat e zeza nuk mund të japin një dënim më të lartë nga sa ka kërkuar organi i akuzës në konkluzionet përfundimtare, sipas Kodit të Procedurës Penale.
