Prej sot e në vazhdim Argjirolajm.net do të vijë me një dizajn të ri për lexuesit. Kur jemi afër tre vjetorit të themelimit dhe shndërrimit shumë shpejt në median online më të lexuar në jug të vendit, ne vlerësuam se duhej bërë një ndryshim në dizajn. Inovacioni është një domosdoshmëri në kohët e sotme, prandaj vijmë tashmë me një paraqitje të re.
Besojmë se kjo do të pëlqehet nga lexuesit tanë. Jemi duke punuar ndërkohë edhe për krijimin e aplikacionit, i cili do të jetë gati brenda një kohe të shkurtër. Ajo që s’ka për ta ndryshuar është vendosmëria jonë për të raportuar me profesionalizëm gjithçka ndodh kryesisht në jug të vendit, ku ne kemi fokusin më të madh, por pa harruar edhe zhvillime të tjera kombëtare e ndërkombëtare me interes publik. Do të vazhdojmë të jemi vëzhgues të mprehtë të ngjarjeve dhe do të ruajmë qasjen tonë kritike për shumë fenomene.
Natyrisht që nuk presim që ju të bini dakord në çdo rast me ne. Ne kemi këndvështrimin tonë për ato që raportojmë. Merakun më të madh kemi që të mos biem në kurthin e “fake news” dhe të mos fyejmë apo denigrojmë askënd për asnjë arsye. Për çdo tjetër ne biem dakord për të mos rënë dakord me njëri-tjetrin. Ne besojmë në Zot dhe tek liria. Çdo gjë tjetër është kalimtare dhe duhet trajtuar si e tillë. Për rreth 3 vite Argjirolajm.net është rritur ditë pas dite falë këmbënguljes tonë dhe pasionit për të bërë diçka ndryshe.
25-30 mijë lexues në ditë janë treguesi më i qartë i suksesit modest që kemi arritur deri më tani, por domethënës dhe me impakt jo të vogël në jug të vendit. Bashkë me ju kemi për t’u rritur akoma më tej. Ky është vetëm fillimi i një rrugëtimi të gjatë. Faleminderit me zemër që na lexoni, faleminderit që keni qenë me ne për rreth 3 vite. Vazhdojmë përpara me besimin se kemi ende shumë për të thënë e për të treguar. Plot histori e ngjarje të tjera na presin! Argjirolajm.net është me njerëzit!
© argjiroja.net
