Milan i ri, histori e vjetër. “Djalli” bie në testin e parë në epokën Allegri2. Në Singapor, ndaj Arsenal, ekipi kuqezi nisi fazën përgatitore me një humbje minimale 1-0. Sigurisht, rezultati është gjëja e fundit që ka rëndësi, por Milan shfaqi pak ose aspak sinjale pozitive. Allegri e nisi këtë test me skemën 3-5-2, por i kushtëzuar nga mungesa të shumta, ku lojtarë si Modric e Giminez janë ende me pushime, ndërsa Maignan, Jimenez e Fofana në stol. Në pritje të Estupinan, me anësorin ekuadorian që zbarkon në Milano këtë të enjte për të zhvilluar testet mjekësore, Allegri hodhi në fushë nga minuta e parë blerjen e kësaj vere, Samuele Ricci, ndërsa sulmin ia besoi dyshes Leao-Pulisic.
Milan e kishte të vështirë të ndërtonte aksione të rrjedhshme sulmuese, krijuan vetëm 3 raste dhe goditën vetëm një herë kuadratin. Arsenal kishte jo vetëm kontrollin e topit, por ekipi i Artetas krijoi 23 raste, goditi 9 herë kuadratin. Pas një pjesë të parë të mbyllur me rrjeta të paprekura, në minutën e 53-të, Saka me një goditje brenda në zonë gjeti golin, detaj që bëri diferencën deri në fund të këtij takimi.
Pas kohës së rregullt, për të argëtuar tifozët e pranishëm në stadium, u goditën edhe penalltitë, aty ku Milan ishte më i saktë duke fituar 6-5.
Në përfundim të këtij testi të parë, trajneri Allegri u shfaq i kënaqur: “Sigurisht që ishte një test i mirë kundër një prej skuadrave më të forta në Evropë. Jam i lumtur nga ajo që pashë edhe pse kemi vetëm 15 ditë që kemi nisur përgatitjet. Do të kemi kohë për të mësuar dhe përmirësuar. Leao? Zhvilloi një ndeshje të mirë, jam i kënaqur”, u shpreh Allegri i cili ndër të tjera konfirmoi edhe afrimin e Estupinan.
(BalkanWeb)
