Kryeqyteti është tronditur nga një shpërthim me tritol në një makinë pasditen e kësaj marte. Ngjarja e rëndë ka ndodhur në zonën e “Vasil Shantos”.
Siç duket nga pamjet, dyshohet që makina të ketë qenë në lëvizje në momentin e shpërthimit. Dyshohet se shpërthimi ka ndodhur me telekomandë.
Për momentin raportohet se në makinë ka qenë vetëm drejtuesi i mjetit, i cili ndodhet në gjendje kritike.
Gazetari Artan Hoxha ka zbuluar ndërkohë identitetin e personit të plagosur.
Sipas tij, personi që ka mbetur i plagosur në atentatin me tritol, është Preng Gjini.
Preng Gjini, sipas Hoxhës, është vëllai i Armando (Tonin) Gjinit, ish-ushtari i Met Kananit, që u ekzekutua në Rrëshen.
Armando Gjini, i njohur si një nga pjesëtarët e grupit të Met Kananit, u ekzekutua në qendër të qytetit të Rreshenit vitin e kaluar.
Ai po lëvizte me makinë bashkë me dy fëmijët dhe bashkëshorten e tij, kur dy persona kanë qëlluar me armë zjarri duke e lënë të vdekur.
48-vjeçari kishte dy identitete, Armando Gjini dhe Tonin Gjini.
Armando Gjini u arrestua me 12 maj 2018 si pjesë e grupit të baronit të drogës, Met Kanani.
Në kuadër të operacionit ‘Precizioni’ Gjini u arrestua së bashku me 37 persona të tjerë dhe u sekuestruan 8 ton drogë.
Por 4 ditë pas arrestimit, Gjini u lirua nga burgu.