Atë që nuk e bën dot Trump, e realizon Malajzia! Tajlanda dhe Kamboxhia bien dakord për armëpushim të menjëhershëm

Tajlanda dhe Kamboxhia kanë rënë më në fund dakord për një armëpushim të menjëhershëm dhe pa kushte, pas më shumë se një dekade tensionesh dhe përplasjesh të përgjakshme.
Marrëveshja historike u arrit falë ndërmjetësimit të kryeministrit të Malajzisë, Anwar Ibrahim, i cili organizoi bisedimet në rezidencën e tij zyrtare në Putrajaya.
Ky zhvillim vjen pasi përpjekjet e mëhershme ndërkombëtare, përfshirë ato të Presidentit amerikan Donald Trump, kishin dështuar. Trump kishte bërë thirrje për armëpushim, por palët kishin refuzuar të ulnin armët dhe luftimet kishin vazhduar pa ndërprerje.
“Të dyja palët arritën një mirëkuptim të përbashkët,” deklaroi Ibrahim, duke shtuar se armëpushimi hyn në fuqi që në mesnatën e së hënës, sipas orës lokale.
Konflikti ka shkaktuar të paktën 35 viktima dhe ka detyruar mbi 270 mijë persona të largohen nga shtëpitë e tyre. Luftimet kanë qenë më të ashprat në më shumë se dhjetë vjet.
Në takim ishin të pranishëm edhe ambasadorët e SHBA-së dhe Kinës në Malajzi, duke shtuar peshën ndërkombëtare të marrëveshjes.
Ndërsa shumë liderë botërorë nuk arritën të ndalonin gjakderdhjen, Malajzia duket se e ka thyer këtë bllokadë diplomatike – duke dëshmuar se diplomacia e heshtur, por e qëndrueshme, mund të japë rezultate aty ku retorika e fuqishme kishte dështuar.