E ardhmja e Julian Alvarez vazhdon të mbetet një nga çështjet më të nxehta të merkatos së verës. Barcelona nuk ka hequr dorë nga sulmuesi argjentinas dhe po tenton përpjekjen e fundit për ta bindur Atletico Madridin të pranojë transferimin.
Drejtori sportiv Deco ka udhëtuar në Madrid për bisedime me përfaqësuesit e lojtarit, në një moment që konsiderohet vendimtar për negociatat. Megjithatë, Atletico vazhdon të mbajë të pandryshuar qëndrimin, duke e konsideruar Alvarezin një lojtar të paprekshëm dhe duke përjashtuar mundësinë e shitjes te një rival direkt në La Liga.
Sipas raportimeve, nëse dëshiron të veshë fanellën blaugrana, vetë Alvarez mund të detyrohet të ndërhyjë për të shtyrë transferimin. Sulmuesi argjentinas thuhet se e ka Barcelonën si destinacionin e preferuar në rast largimi nga Atletico.
Ndërkohë, situatën po e ndjekin me interes edhe klubet e Premier League. Arsenal mbetet alternativa më serioze nëse negociatat mes Barcelonës dhe Atleticos dështojnë, ndërsa edhe Tottenham është në gatishmëri për të hyrë në garë.
Për momentin, Barcelona vazhdon të shpresojë, por fjala e fundit i takon Atleticos dhe vetë Julian Alvarez, ndërsa merkatoja po hyn në ditët e saj vendimtare.
