Kryetari i PD-së Lulzim Basha akuzon qeverinë se ka dështuar me përpjekjet për të sjellë në vend vaksinën kundër Covid. Në një intervistë për Syri Tv, Basha tha se Rama nuk ka mundur të shfrytëzojë mundësitë që jep marrëdhënia me Bashkimin Europian duke transferuar fondet e tjera në funksion të vaksinave.
“Ka një instrument Shqipëria që quhet instrumenti i paraaderimit i cili ka fondet dhe këto fonde vendeve anëtare shumë më herët duhet t’ju ishim përqasur dhe duhet t’ju kishim thënë: “Shikoni, për fat të keq këtë vit ne nuk mund të investojmë në ujësjellësin që kishim planifikuar të investonim me këto para as në ndërtimin e kapaciteteve të departamentit të administratës publike sepse këtë vit njësoj si në vendin tuaj edhe në vendin tim problem kryesor është pandemia.
A ka mundësi që këto para, që në fakt janë të taksapaguesve tuaj të m’i konvertosh në vaksina? Se unë e di që ti ke marrë më shumë vaksina, ke porositur vaksina më shumë se sa të duhen” – tha Basha që shtoi se kjo negociatë duhet të kishte nisur prej muajsh siç e kanë nisur vendet e rajonit.
“Prandaj Shqipëria ka mbetur në bisht sepse edhe për këtë çështje shumë të rëndësishme siç ua thashë ky nuk ka sjellë as vaksinat kundër gripit normal jo më vaksinat kundër COVID-it. Thelbi i saj është që si në çdo fushë tjetër edhe në fushën e menaxhimit të COVID-it Edi Rama është një dështim i pakrahasueshëm më çdo kryeministër tjetër të rajonit” – tha Basha.
