Bashkia Gjirokastër nuk do të japë më financim direkt për klubin e futbollit Luftëtari. Në mbledhjen e fundit të Këshillit Bashkiak për miratimin e buxhetit, kaluan vetëm 53 milionë lekë të vjetra për akademinë e futbollit. Pra, nga 1 janari e tutje Bashkia Gjirokastër do të japë para vetëm për stërvitjen dhe përgatitjen e fëmijëve që duan futbollin. Ekipi i parë do të ketë burim të ardhurash kompaninë që e ka privatizuar, ku aksioner kryesor është Bekim Halilaj.
Ndërkohë 20 milionë lekë të vjetra do t’i shkojnë klubit për të shlyer disa detyrime ndaj të tretëve, kryesisht ujin dhe dritat. Pra, jemi në kushtet kur klubi Luftëtari si shoqëri aksionere, që deri dje drejtohej nga Gole Tavo, nuk ka shlyer as detyrimet ndaj OSHEE-së dhe Ujësjellësit. Për të mos folur pastaj për malin me borxhe që ka ndaj futbollistëve apo subjekteve të tjera.
Kjo lëvizje e Bashkisë Gjirokastër mund të duket në momentin e parë si ‘prerje në besë’, por realisht duke parë keqpërdorimin e fondeve që është bërë tek Luftëtari, për të cilat ende s’ka transparencë, mosfinancimi është vendimi më i drejtë. Pse duhet që paratë e taksapaguesve të Gjirokastrës të shkojnë në një kompani private me zero transparencë për aktivitetin e saj?
Bashkia ka vetëm 25% të aksioneve, ndërsa 75% i zotëron kompania private. Pa u bërë fillimisht një audit i plotë dhe transparencë për çdo qindarkë para publike, financimi i mëtejshëm i klubit Luftëtari do të ishte vendim i gabuar. Sikundër ne e kemi thënë edhe më herët në raportimet tona, një nga arsyet e largimit të Gole Tavos nga drejtimi i klubit, ishte sepse me ardhjen e Flamur Golemit në krye të bashkisë, mbyllej ‘rubineta’ që e furnizonte me para.
Për fat të keq Zamira Rami, por edhe një pjesë e anëtarëve të Këshillit Bashkiak, përfshi këtu plot socialistë që sot kanë ende mandat përfaqësimi, kanë ‘noterizuar’ çdo kërkesë të Gole Tavos për fonde publike. Bashkë me Zamira Ramin ata kanë çuar dorën për t’i dhënë qindra milionë lekë klubit Luftëtari, para të cilat nuk dihet se si dhe ku përfunduan.
©argjiroja.net
