Nëse do duhej të gjendej një sinonim për varfërinë shqiptare, ai do të ishte “Bulqiza”, nëse do duhej të gjendej një sinonim për pasurinë shqiptare, ai do të ishte sërishmi “Bulqiza”, dhe nëse do duhej të gjendej një sinonim që i ngërthen të dyja bashkë do të ishte: “Pasuria që vret”.
Gazetari Andrea Danglli ka realizuar një dokumentar në brendësi të nëntokës së këtij vendi ku ka sjellë në ekranin e Euronews Albania realitetin brenda galerive të minierave.
Qyteti i vogël në veri të vendit dhe 63 fshatrat rreth tij, vijojnë të kenë burim kryesor mbijetese punën e nëntokës ku kromi mbetet e djeshmja, është e sotmja, e me gjasë mban fytyrën edhe të së nesërmes.
Pamjet që kanë ardhur ndër vite nga ky vend janë shndërruar në kartolina trishtimi me fëmijë minatorë që rraskapiten të gërmojnë pirgjeve të kromit për ta grumbulluar mineralin në arka, gra minatore që sfiliten dyerve të galerive për të sistemuar stogje, burra që rropaten nëntokës veç për kacidhe të barazvlefshme me jetën.
Çdo përpjekje e bërë për ta ndarë jetën njerëzore nga ajo e skllavërisë, ka qenë dhe ka mbetur mision i pamundur, me dramën dhe pafuqinë ndaj saj si të vetmen digjiturë.
