I destinuar për t’u rikthyer te fitorja pas dy humbjeve në transfertë, Luftëtari i Mlladen Milinkoviçit nuk humbet kohë për përgatitjen e ndeshjes së radhës, atë me Flamurtarin. Parë në këtë këndvështrim, stafi teknik i Luftëtarit ka nisur planin e punës për javën përgatitore, pasi rikthimi te fitorja është detyrë shtëpie për t’u përmbushur.
Barazimi i Vllaznisë me Kukësin e vendos dukshëm Luftëtarin nën trysninë e rezultatit pozitiv para ndeshjes me Flamurtarin. Një arsye më shumë për gjirokastritët për të dhënë maksimumin ndaj Flamurtarit, ku së pari kërkohen pikët e nevojshme për mbijetesën, por edhe për të ruajtur vendin e katërt, që mund t’u sigurojë një biletë për në Kupat e Europës në rast se Skënderbeu fiton Kupën e Shqipërisë.
Për këtë javë pritet të jetë i gatshëm edhe mbrojtësi Bojom, i cili nuk luajti në sfidën e fundit ndaj të kuqve. Rikthimi me grupin i Behar Ramadanit, edhe pse i diferencuar për shkak të lëndimit, si dhe kalimi pa pasoja i dëmtimit të Eduart Rrocës në ndeshjen e fundit, i ofron më shumë mundësi përzgjedhje trajnerit Milinkoviç për përcaktimin e formacionit anti-Flamurtar.
Me vrapime rreth pistës së “Fushës së Vjetër”, pasuar me lojën me topin, ka startuar seanca e ditës së parë në kuadër të ndeshjes me Flamurtarin. Vlonjatët janë kundërshtari që u kanë shkaktuar humbjen më të thellë gjirokastritëve, 5-0, në kuadër të javës së dytë të kampionatit.
MUTUMANE
Ndonëse pritet rikthimi i të dëmtuarve, Luftëtari nuk do të jetë sërish i plotë ndaj Flamurtarit. Ndaj vlonjatëve, Luftëtari do të vuajë mungesën e mesfushorit nga Mozambiku, Usama Mutumane, i cili është i skualifikuar nga kartoni i kuq që mori ndaj Partizanit. Gjithsesi, rikthimi i Bojomoit në qendër të mbrojtjes, si dhe i mesfushorit Behar Ramadani, pas një mungese katërjavore, janë një ogur i mirë për strategun e bluzinjve Mlladen Milinkoviç për formatimin e formacionit ideal ndaj Flamurtarit./panorama
