Me fushat gati pas ndërhyrjes së fundit nga klubi dhe hotelin me kushte optimale, pritet që javën e ardhshme ballshiotët të nisin përgatitjet me grup të plotë.
Madje, janë programuar edhe stërvitje me dy seanca në ditë, si dhe ndonjë ndeshje miqësore fundjavën e ardhshme. Te Bylisi, vitet e fundit kanë ardhur lojtarë pa eksperiencë, pasi kryesisht vinin nga ekipe të kategorive të ulëta. Por edhe pse kështu, ata kanë shpërthyer e kanë spikatur në Ballsh. Trumçi që prej një viti është shitur te Shkëndija e Tetovës, apo dhe Arli Përgjoni që është një nga zbulimet e Bylisit dhe u grumbullua nga Kombëtarja, pasi performoi shumë të mirë me ballshiotët në elitë.
Në Ballsh ka disa elementë që pritet të jenë në maksimumin e tyre si, Marku, por edhe Përndreca, senegalezin Kane apo kamerunasi Koxhi, nigeriani Akibu në sulm, Igor, apo dhe Sulovari. Këta janë lojtarë premtues dhe kanë marrë minuta edhe në Superiore. Ndaj edhe këtë sezon të ri, që nis në fundin e gushtit, pritet që ata të kthehen në protagonistë te Bylisi. Në Ballsh, kanë në plan ndërtimin e një ekipi me synime të qarta në kampionat, por edhe në Kupën e Shqipërisë, pasi mallakastriotët do të kenë si objektiv sezonal trofeun e dytë për nga rëndësia. Bylisi ka një avantazh të dukshëm me shumë ekipe që kanë nisur të përforcohen, ndonëse edhe skuadrat që u ngjitën për herë të parë në elitë janë mjaft aktive deri në këto momente me tregun e verës, i cili ka pak më shumë se një muaj që ka nisur.
Kjo, pasi ka 80 për qind të kontingjentit dhe se janë një skuadër me një eksperiencë afro prej dy dekadash në elitën e futbollit shqiptar. Së dyti, janë një ekip me financa të konsoliduara dhe që di të fitojë jo vetëm në fushën e vet, por edhe në transferta, ku edhe kanë marrë pikët e plota ndaj pretendentëve për titull. Ndonëse deri tani ka pasur vetëm largime dhe asnjë afrim, pritet që ballshiotët të bëjnë së shpejti zyrtarizimet e para. Këtë javë që do të nisë, do të ketë surpriza në Ballsh, sidomos në aspektin e stafit dhe merkatos në hyrje dhe dalje.
