Zëvendës ministrja e Arsimit, Lorena Haxhia është prononcuar këtë pasdite në emisionin “Ftesë në Pesë” për atë që u konsiderua si gafë gjatë fjalimit të mbajtur ditën e djeshme në Panairin e Punës. Lorena pranoi se ishte shumë e ndërgjegjshme për artikulimin e atillë të shprehjes popullore “çfarë do të mbillni do të korrni” dhe nuk e konsideron si një ngatërresë nga ana e saj. Ajo shtoi më tej se u interpretua si e tillë dhe u bë virale për shkak të deformimit nga mediat.
“Në fjalën përmbyllëse unë citova dhe thashë ‘nisjani me punë dhe çfarë të korrni sot në panair, do të mbillni nesër në tregun e punës’. Çka do të thotë, të gjithë studentët ishin të ekspozuar ndaj ofertave të punës që ishin prezente në stendat e Panairit, ndaj ata kanë mbjellë përgjatë një procesi të gjatë studimesh, tani ishte momenti që të korrnin ato dije që kanë akumuluar, e më pas ky proces është i pambarimtë gjatë gjithë jetës…”, deklaroi Haxhia.
