Protesta e sotme në Sarandë, aty ku kanë nisur punimet për zgjerimin e shëtitores, ndonëse ishte e vogël për nga pjesëmarrja, dhe kjo është e kuptueshme për një qytet që ‘fle’ gjatë dimrit, tregon në fakt diçka tjetër; mënyrën e mbrapshtë se si bëhen punët publike në Shqipëri. Është e kotë të kërkojmë organizatorë imagjinarë apo të zbulojmë nëse aty i kanë futur hundët njerëz të PD-së apo LSI-së. Kjo s’ka fare rëndësi.
Problemi është gjetkë. Për një investim të tillë madhor, Bashkia Sarandë dhe Fondi Shqiptar i Zhvillimit, nuk kanë organizuar asnjë dëgjesë publike, ku së paku të prezantojnë projektin dhe vlerën e shtuar që ai ka për qytetin bregdetar. Kaq gjë është minimalja që duhet kërkuar prej Bashkisë dhe FSHZH-së si financues i investimit milionësh. Për fat të keq kjo nuk ka ndodhur. Projekti i shëtitores parashikon prishje objektesh, zgjerim dhe konfigurim të ri të hapësirës anës detit.
Por mesa duket firma “Fusha” e ka nisur me prishjen e plazhit të Çentralit si fillim, gjë që ka ngjallur një lloj reagimi tek disa qytetarë të Sarandës, të cilët qoftë dhe për arsye nostalgjie me atë hapësire të vjetër të Sarandës dolën sot në protestë. Ata nuk janë shprehur kundër projektit, por ndihen të nëpërkëmbur, të papërfillur nga Bashkia dhe qeveria. Kanë mjaftuar vetëm disa thirrje në rrjetet sociale që ata të tubohen para plazhit duke moslejuar mjetet e firmës të vijojnë punën.
Kryebashkiaku Adi Gurma ka thënë se kjo është një furtunë mediatike dhe se sipas tij inertet e hedhura në plazh janë për shkak punimesh dhe se plazhi do të rikthet siç ka qenë më parë. Por nga ana tjetër Gurma pranon në heshtje se për projektin në fjalë nuk është bërë asnjë dëgjesë publike me qytetarët, duke nisur direkt me zbatimin e tij.
Protestuesit kanë thënë se do të bashkohen sërish në protestë deri në momentin që do të ketë më shumë transparencë nga Bashkia. Lajmin për lungomaren e Sarandës e pati dhënë kryeministri Edi Rama në fillim të muajit gusht. “Njësoj siç Lungomarja transformoi Vlorën, ky investim do të ndryshojë faqen e Sarandës turistike” shkruante kryeministri teksa prezantonte dhe imazhe nga projekti.
©argjiroja.net
