Me një buqetë lulesh fillimisht dhe pastaj me llokume në zyrë. Kështu u prit në Dropull ministri i Brendshëm, Sandër Lleshaj gjatë vizitës së djeshme. Ai ishte në fshatin ku ndodhet zyra e kompanisë “Aleat”, në të cilën bëhet aplikimi për karta identiteti dhe pasaporta. Lleshaj u përshëndet edhe me disa banorë që po prisnin aty në radhë.
Ministri shoqërohej nga kryebashkiaku Dhimitraq Toli, prefekti Astrit Aliaj, numri dy i Policisë së Shtetit, Aida Hajnaj dhe drejtori i Gjirokastrës, Perlat Vatoci. Lleshaj iu përgjigj nga Dropulli interesimit të medias për cështjen e negociatave. Ndërkohë “pas perdes” ai ka kërkuar nga Policia e Gjirokastrës dhe kryebashkiaku i Dropullit që të menaxhojnë mirë zhvillimet e pritshme në 28 tetor, që përkojnë me festën kombëtare të Greqisë dhe 1 vjetorin e vrasjes së ekstremistit Kostandin Kacifas.
Pas 10 ditësh do të organizohet në Dropull ceremonia në varrezat e Bularatit. Ndërkohë që nga Greqia pritet të mbërrijnë edhe persona të tjerë për të nderuar ekstremistin Kostandin Kacifas, i cili u qëllua nga forcat RENEA pas shkëmbimit të zjarrit në pjesën e sipërme të fshatit.
©argjiroja.net
