Luftëtari ka treguar vitet e fundit se është ndoshta ekipi më adapt për shpërthimin e lojtarëve të rinj të talentuar. Bregu dhe Abazaj gjetën terrenin e duhur në Gjirokastër, shpërthyen dhe tani janë ata që janë. Ky fakt duket se ka ndikuar që në seancën e parë stërvitore të Luftëtarit të dyndin futbollistët e rinj, që sigurisht do t’i nënshtrohen provës së trajnerit të ri, Millosh Kostiç. Jo vetëm të rinj nga ekipit zinxhir të Luftëtarit, por edhe nga qytete të tjera, madje edhe nga jashtë vendit, do të vëzhgohen nga stafi teknik i Luftëtarit, që më pas do të vendosë për ndonjë element me vlerë.
Ndër emrat që ishin dje në stërvitje në Gjirokastër, ishte edhe sulmuesi Franc Bakalli, ish-lojtar i kombëtareve të moshave. Të tjerët ishin Gjergji Dhima, Erald Hyseni, Dhimitër Andoni, Gernad Shameti, Albi Peza, Niko Haxhi dhe Fatih Jusufi. Mungonin dje Rroca, Jakovljeviç dhe Xhekson, dy të parët të dëmtuar, kurse braziliani pritet të kthehet nesër në ekip. Po ashtu, nuk pati asnjë emër të ri sa u takon përforcimeve të paaralajmëruara se do të vinin nga jashtë vendit.
