Charlize Theron ka reaguar ndaj komenteve të Timothée Chalamet për baletin dhe operën, duke i cilësuar ato si të pamatura dhe të padrejta ndaj këtyre formave arti.
Në një intervistë për New York Times, aktorja e “Monster”, e cila ka një të kaluar në balet, foli hapur për përkushtimin ekstrem që kërkon kërcimi. Ajo theksoi se ishte “ndoshta një nga gjërat më të vështira që [ajo] ka bërë ndonjëherë”.
“Kërcimtarët janë superheronj. Ajo që ata i bëjnë trupit të tyre në heshtje të plotë,” tha ajo, ndërsa intervistuesi u përgjigj: “Na fal, Timothée Chalamet.”
“Oh Zot shpresoj ta takoj një ditë”, shtoi Theron me ironi.
Duke vijuar më tej, ajo u tregua më e drejtpërdrejtë në qëndrimin e saj: “Ishte një koment shumë i pamatur për një formë arti, dy forma arti, që ne duhet t’i mbështesim vazhdimisht, sepse, po, ato e kanë të vështirë,” u shpreh aktorja.
Theron preku edhe zhvillimet teknologjike, duke bërë një krahasim të fortë: “Por pas 10 vitesh, inteligjenca artificiale do të jetë në gjendje të bëjë punën e Timothée-së, por nuk do të jetë në gjendje të zëvendësojë një person në skenë që kërcen live. Dhe ne nuk duhet të flasim keq për forma të tjera arti.”
Aktorja e “The Devil’s Advocate” ndau edhe eksperiencat e saj personale nga baleti, duke theksuar disiplinën dhe sakrificën ekstreme që kërkon kjo fushë.
“Është në kufijtë e abuzimit. Ka pasur disa herë kur kam pasur infeksione në gjak nga flluskat që thjesht nuk shëroheshin kurrë. Dhe nuk ke një ditë pushim,” shpjegoi ajo.
