Cilat janë variantet për datën e zgjedhjeve

Shqiptarët e interesuar për zhvillimet politike kanë të gjithë një pyetje këto ditë. Pasi janë të bindur se në 18 qershor nuk do të ketë votime, pyetja që vlen “1 milion dollarë” është: “Cila do të jetë data e zgjedhjeve të përgjithshme?” Në negociatat mes qeverisë dhe opozitës kjo çështje ishte nga ato që mban ende pezull negociatat. Opozita kërkon që zgjedhjet të shtyhen të paktën në shtator në datat 3 ose 10 për t’i dhënë mundësi realizmit të kërkesave të saj për të pasur nën kontroll administrimin e zgjedhjeve. Kryeministri Edi Rama këmbëngul që data e zgjedhjeve të mos kalojë tej 23 korrikut. Një burim i tha lapsi.al se një datë e diskutuar për datën e zgjedhjeve ka qenë edhe muaji dhjetor për t’i dhënë mundësi realizmit të votimit dhe numërimit elektronik, por kjo është refuzuar kategorikisht nga qeveria.