Drejtori i Organizatës Botërore të Shëndetësisë për Europën, Hans Kluge tha se pandemia e COVID-19 do të përfundojë në fillim të vitit 2022. Ditën e djeshme, ai theksoi për televizionin shtetëror danez DR se gjatë vitit 2021 COVID-19 do të vazhdojë por do të jetë më i menaxhueshëm se sa në vitin 2020, duke shtuar se më e keqja ka mbaruar. Sipas tij tani ka më shumë informacion lidhur me virusin. Kluge është shprehur se variantet e reja të COVID-19 janë normale megjithëse shpejtësia e përhapjes së tyre është shqetësuese.
Kreu i OBSH-së për Europën tha se OBSH-ja është duke monitoruar nga afër efektivitetin e vaksinave të zhvilluara anti-COVID, pasi për shkak të mutacioneve të virusit ndoshta do të jetë e nevojshme të ndryshojnë për të luftuar edhe variantet e reja.
