Digjen gjatë natës në rrethana dhe shkaqe ende të paqarta, në fshatin Stjar të Delvinës, një autobus dhe një furgon, teksa policia vendore nisi menjëherë hetimet dhe dëmet materiale janë të konsiderueshme.
Zjarri dyshohet se ka rënë në autobusin ndërqytetës, në pronësi të shtetasit me inicialet Ç. B. Nga flakët në autobus, më tej ka marrë zjarr edhe furgoni i një kompanie private që ndodhej i parkuar aty pranë.
Policia e Delvinës ka nisur hetimet në vendin e ngjarjes për të përcaktuar shkaqet e rënies së zjarrit. Paraprakisht dyshohet për një shkëndijë elektrike në motor, por nuk përjashtohet dhe zjarrëvënia e qëllimshme.
Policia pret rezultatet piroteknike të ekspertëve dhe verifikimin e kamerave në zonë. Pronari i autobusit tha se nuk ka konflikte me askënd dhe po ashtu ai i mjetit furgon.
