Ndalesa e radhës e drejtuesit politik të Partisë Socialiste në qarkun Vlorë, Bledi Çuçi, ishte Rajoni 3 në qytetin e Vlorës, aty ku prezantuan kandidatet për deputete, Zamira Sinaj dhe Briseida Çakërri. E para në listën e mbyllur të PS-së dhe e dyta në listën e hapur.
Çuçi tha gjatë fjalës së tij para anëtarëve dhe simpatizantëve të PS-së se në këto zgjedhje është mundësia historike për të fituar 9 mandate deputetësh qarkun Vlorë.
“Me plot gojën sot në vigjilje të një fushate ku do kërkojmë mandatin e katërt, ne themi po, Partia Socialiste është e vetmja forcë që mund ta çojë përpara Shqipërinë dhe mund ta bëjë pjesë të Bashkimit Europian. Nuk ka forcë tjetër në Shqipëri. Nuk është e lehtë t’u kërkosh votën njerëzve pas 3 mandatesh qeverisje sepse qeverisja të konsumon, por nën vizionin e kryeministrit Edi Rama ne ia kemi dalë të jemi oferta e vetme për shqiptarët”, deklaroi Çuçi.
Për transformimin e Vlorës dhe shndërrimin e saj në një destinacion të turizmit në Mesdhe, Çuçi tha se kjo nuk ka ndodhur rastësisht dhe as ka ardhur nga qielli. Dikur sipas tij Vlora nuk kishte jetë dhe as një perspektivë të qartë zhvillimore.
“Sot Vlora është perla e Mesdheut dhe është një nga vendet turistike me atraksionin më të madh. Këto gjëra duhet t’ua kujtojmë vlonjatëve sepse këto nuk kanë ardhur nga qielli, por i kemi bërë ne socialistët. Kjo fushatë shkon përtej pragut tonë. Shkon përtej interesit tonë si vlonjat, kjo fushatë shkon për të ardhmen e fëmijëve tanë, shkon për Shqipërinë pjesë e Bashkimit Europian”, u shpreh Çuçi.
Sipas drejtuesit politik të socialistëve, kthimi pas në kohën e Sali Berishës do të ishte fatal për Vlorën dhe Shqipërinë.
“Sikur asgjë mos kishim bërë nga këto që po ju them, sikur asgjë të mos ishte realitet i afërt në 2027. Po të mbyllim sytë dhe dikush të na thotë në vesh: keni alternativë Sali Berishën. A e imagjinoni dot çdo të ndodhte këtu në Vlorë dhe në të gjithë Shqipërinë, që të binte në dorën e Sali Berishës Vlora dhe Shqipëria prapë? Prandaj them se kemi një rast historik që ne të marrim 9 mandate këto zgjedhje për qarkun e Vlorës”, deklaroi Çuçi.
