Drejtuesi politik i Partisë Socialiste në qarkun Vlorë, Bledi Çuçi, thotë se PS ka mundësi që të marrë nëntë mandate deputetësh në këtë qark. Sipas tij zgjedhje e 11 majit do të nxjerrin qeverinë që do të firmosë anëtarësimin e Shqipërisë në BE. Deklaratat Çuçi i bëri gjatë një takimi me simpatizantë dhe anëtarë të PS-së në Rajonin 2 të qytetit të Vlorës.
“Janë të gjitha rrethanat për ta kthyer në një rezultat historik. Kemi rikthimin e Damianit i cili ka drejtuar në mënyrë të shkëlqyer qarkun e Vlorës më shumë se 6 vite dhe ka udhëhequr dy beteja shumë të suksesshme për Partinë Socialiste. Sot kemi mundësinë historike për të bërë një tjetër rezultat historik për të marrë mandatin e nëntë. Janë zgjedhjet që do të nxjerrin qeverinë që do të firmosë anëtarësimin e Shqipërisë në BE”, deklaroi Çuçi.
Të pranishëm në takimin ishin edhe kandidatët e tjerë për deputetë, Pirro Vengu, Mjaftesa Sulaj dhe Damian Gjiknuri. Qarku Vlorë dërgon në Kuvend 12 mandate deputetësh. Në zgjedhjet e shkuara parlamentare PS fitoi 8 mandate.
