Ministria e Punëve të Brendshme, e drejtuar nga Sandër Lleshaj deklaroi sot se është gati për procesin zgjedhor të 30 qershorit. Kjo deklaratë vjen në kulmin e debatit për shtyrjen e 30 qershorit dhe kur mbahet protesta e 6-të e opozitës tek Kryeministria.
Në njoftim thuhet se është gati lista përfundimtare e zgjedhjeve dhe do të afishohet së shpejti. Sipas MB janë mbi 3.5 milionë qytetarë me të drejtë vote, ku shumica (51 për qind) janë burra.
Deklarata e plotë për mediat e MB:
Publikohet Lista Përfundimtare e Zgjedhësve. Ministria e Brendshme ka publikuar listën përfundimtare të zgjedhësve për zgjedhjet vendore të datës 30 Qershor 2019.
Nga të dhënat e gjeneruara nga Drejtoria e Përgjithshme e Gjendjes Civile të drejtën e votës e kanë 3,536,015 shtetas shqiptarë, ndër ta, 132.788 zgjedhës votojnë për herë të parë; 51 % e zgjedhësve janë meshkuj dhe 49 % femra. Lista Përfundimtare e Zgjedhësve ka përmirësime të dukshme në raport me zgjedhjet e kaluara, qoftë ato për pushtetin vendor të vitit 2015, ashtu edhe ato parlamentare të vitit 2017.
Për herë të parë u arrit të zbardheshin adresat e sakta për rreth 285 mijë zgjedhës, të cilët në vend të adresës së vlefshme kishin kodet 999, 888 dhe 000 në listën zgjedhore, duke i eleminuar këto kode. Në listën e përditësuar janë hequr dublikimet dhe votuesit mbi 100-vjeçarë, si dhe emrat e personave që vuajnë dënimin në burgje, sipas përcaktimeve të ligjit, në kuadër të ‘Dekriminalizimit’.
Ministria e Brendshme thekson se i gjithë procesi i hartimit të Listës Përfundimtare të Zgjedhësve është kryer nën mbikëqyrjen e auditëve teknicienë të KQZ-së, të cilët kanë pasur akses të plotë në çdo etapë të këtij procesi.
Në vijim të komunikimeve për listën e zgjedhësve, nënvizojmë se ky proces ka nisur në zbatim të dekretit të Presidentit nr. 10928, datë 05.11.2018, “Për caktimin e datës së zgjedhjeve për organet e qeverisjes vendore”. Më pas u hartua dhe miratua Udhëzimi nr.295/1, i datës 06.11.2018 “Për procedurat e hartimit të listave të zgjedhësve për zgjedhjet e organeve të qeverisjes vendore”.
Hapat e procesit ishin:
– ekstrakti i parë i përbërësve zgjedhor u publikua më datën 4 dhjetor 2018;
– ekstrakti i dytë i përbërësve zgjedhor u publikua më datën 3 janar 2019;
– ekstrakti i tretë i përbërësve zgjedhor u publikua më datën 1 shkurt 2019;
– ekstrakti i katërt i përbërësve zgjedhor u publikua më datë 1 mars 2019;
– ekstrakti i pestë i përbërësve zgjedhor u publikua më datë 29 mars 2019;
– ekstrakti i gjashtë i përbërësve zgjedhor u publikua në datë 28 prill 2019.
Lista përfundimtare përmbyll procesin e hartimit dhe shpalljes së Listës së Zgjedhësve. DPGJC, ashtu sikurse deri tani, do të përmbushë në vijim çdo detyrim ligjor që rrjedh në bazë të Kodit Zgjedhor, për përgatitjen e infrastrukturës zgjedhore.
