Kosova ka zhvilluar sot seancën e fundit stërvitore në Prishtinë, para udhëtimit drejt Pragës, ku të dielën do ta zhvillojë ndeshjen miqësore kundër Çekisë.
Stërvitja u mbajt në stadiumin “Fadil Vokrri”, ku futbollistët punuan me intensitet dhe përkushtim të lartë. Përzgjedhësi Franco Foda, së bashku me stafin teknik, u fokusua në detajet e fundit taktike dhe në organizimin e lojës, në prag të kësaj sfide.
Në kampin dardan atmosfera është shumë pozitive, gjë të cilën e reflektojnë edhe futbollistët, i rikthyeri pas një periudhe të gjatë mungese, Betim Fazliji, si dhe i grumbulluari për herë të parë Dardan Shabanhaxhaj.
Fazliji, i cili luan për St. Gallenin në Zvicër, rikthehet te Kombëtarja pas shumë sfidave me lëndime gjatë viteve të fundit. Mesfushori defensiv nuk kishte luajtur për Dardanët që nga viti 2023, ndërsa rikthimin e tij e cilëson si një moment shumë të veçantë.
“Ka qenë kohë e gjatë. Kam luftuar shumë për këtë moment, që të jem sërish pjesë e Kombëtares. Tani e kam arritur këtë dhe jam shumë i lumtur. Kam besuar në vete, kam pasur mbështetjen e familjes, të federatës dhe të klubit. Grupi duket në formë të mirë, ka edhe lojtarë të rinj dhe secili ka mundësinë ta tregojë veten. Jemi shumë të motivuar dhe pozitivë para ndeshjes me Çekinë”, ka thënë Fazliji.
Ndërkohë, Dardan Shabanhaxhaj po e përjeton grumbullimin e parë me fanellën e Kosovës. Sulmuesi i krahut, i cili luan për Rubin Kazanin, në vitin 2017 ka qenë pjesë e Kombëtares U17 të Kosovës, e më pas pjesë e grupmoshave të Austrisë, ndërsa tani është i gatshëm të japë kontributin e tij për Dardanët.
“Jam shumë i lumtur që jam pjesë e Kombëtares. Çdo ditë do të jap maksimumin për Kosovën. Ekipi dhe stafi më kanë pritur shumë mirë. Çekia është ekip shumë i fortë, por edhe ne kemi lojtarë shumë cilësorë. Duhet të hyjmë në ndeshje me vetëbesim dhe të japim maksimumin. Besoj se mund të marrim rezultat pozitiv”, ka theksuar Shabanhaxhaj.
Kosova do të udhëtojë drejt Pragës, të shtunën, në orët e paradites, derisa stërvitjen atje do ta zhvillojë nga ora 16:00. Një ditë më pas, në të njëjtën kohë, do të përballet me Çekinë në ndeshjen e parë miqësore të këtij grumbullimi.
