Pas dy protestave të zhvilluara në aksin Kardhiq-Delvinë, fermerët e jugut do kenë një takim me ministren e Bujqësisë dhe Zhvillimit Rural, Anila Denaj. Argjiroja.net mëson se takimi do të zhvillohet këtë jave në Gjirokastër. Ministrja pritet të diskutojë me blegtorët çështjet që ata kanë ngritur.
Në protestën e fundit ata derdhën në mënyrë simbolike qumështin në rrugë. Blegtorët kanë parashtruar 4 kërkesa; çmim dysheme për qumështin, rritje të subvencioneve, ndarje të drejtë të kullotave dhe ndërtim të veprave ujore (lerave për ujitjen e bagëtive).
Protesta e tyre nisi pasi disa grumbullues iu kanë komunikuar uljen e çmimit të qumështit nga 170 në 120 lekë për litër. Një ditë më parë policia e Gjirokastrës njoftoi se kishte proceduar penalisht në gjendje të lirë 3 blegtorë për bllokimin për disa minuta të rrugës Kardhiq-Delvinë. ©Argjiroja.net
