Deputeti i Partisë Demokratike, Luan Baçi në një intervistë për “Ditarin” me Bruna Çifligun, në A2 CNN, ka akuzuar Partinë Socialiste se po shfrytëzon asete shtetërore për të bindur shqiptarët e Diasporës që të votojnë për ta në zgjedhjet e 11 majit.
Për ta ilustruar këtë ai solli rastin e Bashkisë së Fierit, që sipas Baçit me një tender ka financuar një koncert me emigrantët në Athinë.
“Partia Socialiste ka vënë në dispozicion asete të shtetit. Ka vënë në dispozicion bashkitë vjedhura të 2023. Para një jave Bashkia e Fierit ka bërë tender madje, duke përzgjedhur këngëtarë, një autobus 30 vendesh dhe i ka dërguar në Greqi, duke organizuar një koncert në Athinë me paratë e bashkisë, me punonjësit e administratës, për të bërë propagandë dhe për të mbledhur votat e diasporës për PS. PS përdor bashkitë, ministrisë, drejtoritë në funksion të votave të diasporës që të shkojnë për ta”, tha Baçi.
Si për të treguar që Partia Demokratike fushatën në diasporë po e zhvillon me shpenzimet personale të deputetëve, Baçi tha se ai vetë do të paguajë për një takim më bashkatdhetarët në Agrinjo javën e ardhshme.
“Unë të shtunën tjetër kam takim në Agrinjo të Greqisë që janë në shumicë nga qarku i Fierit. Këto janë takime që i bëjmë si deputetë, me shpenzimet tona. Ja ku është Greqia, Agrinjo nuk është më larg se 300-400 km nga Fieri”, u shpreh Baçi./A2CNN
