Bashkimi i Dhomave të Tregtisë dhe Industrisë së Shqipërisë dhe Dhoma e Tregtisë dhe Industrisë së qarkut Gjirokastër, shoqëruar me një delegacion biznesesh të kësaj dhome, zhvilluan një vizitë zyrtare në Baku (Azerbajxhan) pranë AZPROMO, Agjensisë për Promovimin e Eksportit dhe Investimeve të Republikës së Azerbajxhanit.
Agjencia për Promovimin e Eksportit dhe Investimeve të Republikës së Azerbajxhanit – AZPROMO, ka për objekt të aktivitetit lehtësimin e eksporteve jo-naftë dhe tërheqjen e investimeve të huaja në sektorin jo-naftë. Takimi i pëfaqësuesve të sipërmarrjes Azerjbaxhan – Shqipëri, u përshëndet nga Kryetarja e Bashkimit të Dhomave të Tregtisë dhe Industrisë së Shqipërisë, Ines Muçostepa, nga Kryetari i Dhomës së Tregtisë dhe Industrisë së qarkut Gjirokastër, Maksim Hoxha si edhe nga zv Drejtori Ekzekutiv i AZPROMO.
Marrëdhëniet e dhjetë viteve të fundit mes dy vendeve janë shumë të tëndësishme dhe të forta. Në pak vite Azerbajxhani dhe Shqipëria kanë rritur ndjeshëm shkëmbimet ekonomike përveç atyre politike. Palët evidentuan se eleminimi i vizave dhe hapja e ambasadave, janë hapa konkretë të forcimit të këtyre marrëdhënieve. Projektet ekonomike që janë zhvilluar, si ai i TAP, apo projekti pilot për gazifikimin e qytetit të Korçës, që pritet të fillojë, janë rrjedhojë e forcimit të kësaj marrëdhënie.
Gjithashtu, në këtë takim u evidentuan edhe fusha interesi të përbashkëta për bashkëpunim siç është energjia, turizmi, si edhe fusha të tjera të cilat kanë të bëjnë me inovacionin dhe dixhitalizimin. Në vijim të prezantimeve, bizneset shqiptare që morën pjesë, zhvilluan takime b2b me kompani azerbajxhanase.
