Dilemat e Ronaldos pa Champions League

Gjigandët u thyen, nuk rezistuan karshi goditjeve të Milanit. Sidomos më i madhi nga të gjithë: Cristiano Ronaldo. Një që në moshën 36 vjeç ende synon të konsiderohet më i miri në botë, por që ka shënuar një seri paraqitjesh negative këtë sezon, veçanërisht kur Juve ka pasur më shumë nevojë për të.
Mjafton të kujtojmë dy ndeshje, që vlenin sezonin. Ndaj Portos, kur jo vetëm humbi takimin me golin, por i dha dritën jeshile goditjes së lirë të Sergio Oliveira, që i kushtoi atij eliminimin nga Champions-i.
Pastaj mbrëmë në “Allianz Stadium”, ku thjesht nuk dukej në fushë, u largua nga lufta duke u tërhequr nga përballja, derisa u zhduk. Dhe tani për herë të parë praktikisht në karrierën e tij rrezikon të qëndrojë jashtë Champions-it. Për shkak se tri ndeshje nga fundi i kampionatit, Juventusi është i pesti në renditje. Pra, jashtë Ligës së Kampionëve, përtej asaj që mund të ndodhë për shkak të luftës midis UEFA dhe Superligës.
Juve, dy rrugët e Cristiano Ronaldos
Për të vazhduar të luajë në Ligën e Kampionëve, siç i ka ndodhur gjithmonë në karrierë, duke filluar me Sporting, për të mos rënë në Serinë B të futbollit europian (Ligën e Europës), Ronaldo ka dy zgjidhje.
E para është e thjeshtë, por shumë e vështirë. Ai duhet të kthehet për të bërë atë që ka bërë gjithmonë, duhet të marrë Juven për dore, duke e tërhequr të paktën në vendin e katërt, i cili tani është shumë larg.
Por, Ronaldo i vërtetë është parë vetëm kohët e fundit për disa minuta në Udine. Zgjidhja e dytë është ajo që do ta shihte atë të largohej nga Torino në momentin e vështirësisë më të madhe që klubi i Juventusit ka kaluar për dhjetë vjet, duke ndryshuar ekip, përkundër një kontrate neto prej 31 milionë euro në sezon, që e lidh atë me bardhezinjtë edhe për një vit tjetër. Nuk ka asnjë alternativë tjetër.