Tekniku i Dinamos, Ilir Daja bëri komentin e tij pas barazimit 1-1 në derbin e kryeqytetit ndaj Tiranës.
“Ndeshjes i bëmë hyzmetin. Çunat treguan karakter, filluam ndeshjen duke marrë gol, edhe pse pas 2-3 minutash patëm rast të pastër. Sigurisht që ishte edhe penalltia pastaj, po të ishte shënuar gol, mundet të kishte një anë psikologjike ndryshe për ekipin tonë, do të barazonim më shpejt rezultatin. Për pjesën tjetër, mbetëm me 10 lojtarë për kartonin e kuq. Morëm barazim me Tiranën që vjen pas ndeshjeve të mira në këtë vit. Por nuk më shpërndau aspak shpërndarja e kartonëve, nuk e di çfarë ndodhi te ajo rrëmujë.
Nuk dua të merrem se nuk kam parë asgjë. Kemi folur një fjalë, e kanë marrë dhe e kanë tjerrur të tjerët. Do e them ditë tjetër kur të jem më i qetë. Me 10 lojtarë bëmë shumë mirë sepse e mbajtëm Tiranën në gjysmëfushën e vet, jo se e zgjodhi Tirana, por nuk dinte të shkonte nga topi poshtë, lart. Djemtë e bënë më mirë lojën me 1 lojtar mangët. Nuk ka shumë taktika, luajtëm kështu apo ashtu, por sakrifica e lojtarëve na çoi të shpresonim deri në fund fare. U shpërblyem me atë barazim, ku për shumë minuta ishin me 1 lojtar mangët.
Duke qenë se edhe ne kishim, përveç Bregut, Guindo është lojtar qëndror si Mustapha, donim që të shfrytëzonim aftësitë e tyre. Bregu ka luajtur edhe sulmues qendre, por ishte për një tjetër manovër. Në prag 3-4 ditësh kemi ndeshje me Tiranën në Kupë. Nuk dua që të zbulojmë se çfarë kemi parë dhe bërë në aspektin taktik. Natyrshëm që s’mund të hapeshim shumë fare, pasi Tirana ka kundërsulm të shpejtë, në mënyrë individuale mund të na dëmtonin. Kishim Ditën dhe Teixeira me kartonë të verdhë, dy qendërmbrojtësit, prandaj bëmë atë mënyrë loje dhe atë rreshtim.
Momentet e para në atë fillim ndeshje, Vogli të spostohej nga krahu i majtë i Tiranës, krahu djathtë i joni. Njëri nga numrat 8 apo 7 shkonte përpara dhe tjetri merrte pozicionin e tij. Qefalija nuk kishte faj, pasi po të luanim me ekran, do të merrte rolin e ekranit. Por e rikuperuam edhe atë gjë. Me lojtarët që kemi në dispozicion. Ajo që kemi ndryshuar është rikthimi i Ditës, pasi ka qenë me temperaturë bashkë me Beqjan. Rikthimi i tij si kapiten dhe mbrojtës, na jep siguri dhe lirshmëri në ndërtim.
Gjëndja e Nezirit, ajo fizike, jep një gjerësi sulmit tonë pasi është lojtar që del shumë shpejt nga poshtë lart, nuk i kishim këto në ndeshjen me Ballshin. Ndoshta këto dy gjëra, presim Alijin dhe Beqjan. Rikthimi i Qefalisë është i rëndësishëm. Këto fillojnë edhe bëjnë që ekipi të marrë atë panoramë që ka qenë në 2025. Dua të nënvizoj, ndoshta duan kohën e vet edhe Malomo dhe Mustapha që të përshtaten me grupin.
Për çfarë të vjen keq sot? Më vjen keq për të gjitha nga pak, por kartoni i kuq pak problem. Përveç se nuk ishte sot, lojtari na mungon edhe në ndeshjen e ardhshme minimalisht. Më shqetëson fakti se po të shohësh kartonët e Dinamos, është ekipi më agresiv në Superligën tonë, me 6 kartonë të kuq. Atëherë unë shoh tjetër gjë nga ato të fushës, VAR-it apo të studiove televizive”, tha Daja.
