Novak Xhokoviç ka deklaruar se është plotësisht i fokusuar te rikthimi i tij në formë për “Roland Garros 2026”, duke theksuar se turnetë Grand Slam mbeten prioriteti i tij kryesor. Kampioni serb, fitues i 24 titujve Grand Slam, ka zhvilluar stërvitje intensive në ditët e fundit për të qenë gati fizikisht për turneun prestigjioz në Paris.
I pyetur mbi protestën e disa tenistëve lidhur me ndarjen e fitimeve në turnetë Grand Slam, Xhokoviç u distancua nga kjo çështje, duke theksuar se nuk ka qenë pjesë e diskutimeve dhe nuk është përfshirë në organizimin e protestës.
“Unë nuk jam pjesë e kësaj dhe nuk kam marrë pjesë në bisedime. Nuk jam brenda atyre 15 minutave”, deklaroi tenisti serb. Xhokoviç, i cili dje festoi 39-vjetorin e lindjes, tha se tenisi duhet të marrë shembull nga sporti i golfit: “Duhet të mësojmë nga ai sport. Ka shumë thashetheme për ndryshime dhe shpresoj që ato të mos sjellin shumë turbulenca”. Xhokoviç nuk i kurseu elozhet edhe për Janik Sinerin: “Pa Karlosin këtu, ai ka më shumë mundësi të fitojë ‘Golden Slam’-in. E di sa e vështirë është të fitosh të nëntë turnetë ‘Masters 1000’”, u shpreh Xhokoviç, i cili do të luajë të dielën kundër francezit Giovanni Perricard.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
