Në takimin e sotëm të thirrur nga Prefekti Gjirokastër me drejtues të institucioneve të ndryshme vendore, drejtori i AKU-së, Beso Brahimi, ngriti edhe shqetësimin e tregtimit të qumështit me bidona plastik nëpër rrugë. Ai la të kuptohej se në këtë rast është Bashkia Gjirokastër ajo që nuk ndërhyn për të penguar tregtimit e qumështit sidomos tek vendi përballë farmacive qëndrore.
“Po të vish deri në orën 10 në lagjen ’18 Shtatori’ tregtohen qindra bidona plastik me qumësht. Për Gjirokastrën të paktën është e pafalshme. Me këtë numër të madh turistësh që hyjnë dhe të shohin këtë lloj tregtie s’ka kuptim”, u shpreh Beso Brahimi.
Tregtimi i qumështit para farmacive në lagjen ’18 Shtatori’ në Gjirokastër është një ritual i vjetër që askush s’ka dashur ta frenojë. Jo vetëm që shitja e qumështit në atë mënyrë mes pluhurit, temperaturave të larta apo edhe shiut nuk është higjenike, por pamja që të ofron cdo mëngjes ai vend nuk është aspak estetike.
©argjiroja.net
