Tri ndeshje e sotme të javës së 25-të në Albi Mall Superligën e Kosovës në futboll kanë sjellë ndeshje interesante, ku në dy sosh fitoreve iu gëzuan skuadrat mysafire. Lideri i renditjes, Ballkani nuk ka lejuar befasi, duke shënuar fitore ndaj skuadrës së fundit në renditje, Prishtinës së Re, me rezultat minimal, 1:0. Golin e vetëm në këtë përballje e realizoi Blerat Tolaj në minutën e 68-të, duke i siguruar skuadrës nga Suhareka tri pikë që e mbajnë në krye të renditjes, me 45 pikë, po aq sa ka edhe skuadra kampione në fuqi Drita, në pozitën e dytë. Kampionët shënuan fitore para tifozëve të vet në duel me Dukagjinin, me rezultat 2:1. Besnik Krasniqi kaloi vendasit në epërsi në minutën e 18-të. Mysafirët barazuan para përfundimit të pjesës së parë përmes Hekuran Berishës, mirëpo golin e fitores për Dritën e shënoi Veton Tusha, në minutën e 64-t.
Ndërkohë, Gjilani ka regjistruar fitore të rëndësishme 3:2 në udhëtim ndaj Llapit, duke u ngjitur në pozitën e tretë në tabelë. Oltion Bilalli realizoi për epërsinë fillestare në “Zahir Pajaziti”, ndërsa Llapi barazoi me Edon Sadriun. Në pjesën e dytë, Senad Jaroviq shënoi nga penalltia për 2:1, ndërsa Blerind Morina realizoi një gol të bukur për 3:1. Llapi arriti të ngushtojë epërsinë me golin e Muhamet Hysenit nga penalltia, në minutën e 82-të, por nuk pati forcë për të barazuar shifrat. Pas kësaj xhiroje, Gjilani ka 39 pikë dhe renditet i treti, ndërsa Llapi mbetet në pozitën e shtatë, por i rrezikuar për rënie nga elita.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
