Policia ka mundur të sekuestrojë në një makinë tip opel një sasi droge prej 77 kg e ndarë në 27 pako. Është arrestuar drejtuesi mjetit Renato Agalliu 51 vjeç banues në Fier. Në njoftimin e policisë thuhet:
Specialistët e Seksionit kundër Narkotikëve në Drejtorinë Vendore të Policisë Vlorë, në kuadër të një hetimi për goditjen e rasteve të prodhim shitjes se lëndëve narkotike si edhe në bazë të informacioneve të siguruara në rrugë operative, ditën e djeshme në lagjen ”11 Janari” në hyrje të autostradës Vlorë-Fier, kanë konstatuar dhe goditur një rast të kësaj veprimtarie të kundërligjshme.
Lënda narkotike e llojit Cannabis Sativa e paketuar në 27 pako dhe e vendosur në çanta sporti, është gjetur në brëndësi të mjetit tip ”Opel”, i cili drejtohej nga shtetasi R. A.
Pas peshimit përfundimtar, lënda narkotike ka rezultuar të jetë 77 kg.
Në përfundim të veprimeve hetimore Policia ka bërë arrestimin në flagrancë të shtetasit :
R. A, 51 vjeç, banues në Fier.
Është sekuestruar në cilësinë e provës materiale, lënda narkotike dhe mjeti tip Opel.
