Artisti dhe deputeti i qarkut Vlorë, Fate Velaj është takuar sot me shkrimtarin e madh Ismail Kadare, me të cilin pati një bisedë miqësore mbi letërsinë dhe shkëmbyen mendime për çështje të tjera të aktualitetit. Velaj publikon në faqen e tij në Facebook foto nga takimi me Kadarenë, të cilat i shoqëron shkurtimisht me frazën ‘Dy europianë në qytet’, teksa shkëmbejnë edhe libra me njëri-tjetrin.
Siç shihet nga fotot, Velaj i dhuron Kadaresë librin e tij më të ri ‘100 Hapa Brenda Europës’, kurse Kadare i dhuron një prej kryeveprave të tij, romanin ‘Dimri i Vetmisë së Madhe’. Në vitin 2013 Fate Velaj u emërua si këshilltar i kryeministrit Rama për diplomacinë kulturore.
Në vitin 2011 Velaj mori titullin ‘Qytetar Europian’, nga Presidenti i Parlamentit Europian, për merita të veçanta në forcimin e bashkëpunimit dhe integrimin e mëtejshëm të vendeve në Bashkimin Europian. Në zgjedhjet e fundit parlamentare ai u zgjodh deputet i Partisë Socialiste në qarkun Vlorë.
©ArgjiroLajm.net
