Tirana do të luajë të shtunën kundër Kukësit në kampionat dhe menjëherë duhet të mendojë për dy ndeshjet e radhës, gjysmëfinalen e parë të Kupës së Shqipërisë dhe ndeshjen e katërt, të fazës së katërt në Superiore. Fati ka dashur që bardheblutë të luajnë dy takime brenda pak ditësh në Gjirokastër, në fillim të mërkurën dhe më pas të dielën.
Duke parë kalendarin, Tirana ka vendosur që të hënën ose të martën të zhvendosë përgatitjet në jug të Shqipërisë. Më saktë, Tirana do të udhëtojë para sfidës së Kupës drejt Gjirokastrës, por do të qëndrojë në Sarandë. Edhe pas ndeshjes gjysmëfinale të parë, bardheblutë do të qëndrojnë në jug, më saktë në Sarandë deri të dielën, për t’u përgatitur edhe për sfidën e kampionatit.
Drejtuesit bardheblu kanë vendosur kështu, që skuadra jo vetëm që të mos lodhet me ecejaket, por edhe të izolohet larg presionit, pasi bardheblutë duhet të fitojnë me doemos dy ndeshjet në Gjirokastër, të cilat me të vërtetë vendosin sezonin e bardhebluve.